नेवासा येथे अवैध मावा व्यवसायावर स्थानिक गुन्हे शाखेचा छापा,मुद्देमालासह आरोपी ताब्यात.

नेवासा येथे अवैध मावा तयार करणाऱ्या अड्ड्यावर स्थानिक गुन्हे शाखेचा छापा!

१ लाख २१ हजारांचा मुद्देमाल जप्त; मावा तयार करणारा आरोपी ताब्यात

नेवासा | प्रतिनिधी

नेवासा : नेवासा शहरातील माळीवस्ती परिसरात सुगंधित तंबाखू व सुपारीमिश्रित मावा तयार करून त्याची विक्री केली जात असल्याची माहिती मिळाल्यानंतर अहिल्यानगर स्थानिक गुन्हे शाखेच्या पथकाने छापा टाकला. या कारवाईत १ लाख २१ हजार रुपये किमतीचा मुद्देमाल जप्त करण्यात आला असून, जावेद फज्जु शेख (वय ३०, रा. माळीवस्ती, नेवासा) याला ताब्यात घेण्यात आले आहे.

गुप्त माहितीच्या आधारे कारवाई

जिल्ह्यातील अवैध धंद्यांविरोधात कारवाई करण्याच्या सूचना पोलीस अधीक्षक मुम्मका सुदर्शन यांनी स्थानिक गुन्हे शाखेला दिल्या आहेत. त्यानुसार पोलीस निरीक्षक संतोष मुटकुळे यांच्या मार्गदर्शनाखाली पथक जिल्ह्यातील अवैध व्यवसायांवर लक्ष ठेवून होते.

२६ ऑक्टोबर २०२६ रोजी नेवासा पोलीस ठाण्याच्या हद्दीत गस्त व माहिती संकलन सुरू असताना, माळीवस्ती येथील जावेद फज्जु शेख हा आपल्या राहत्या घरात महाराष्ट्र राज्यात प्रतिबंधित असलेला सुगंधित तंबाखू व सुपारीमिश्रित मावा तयार करून त्याची विक्री करत असल्याची माहिती पथकाला मिळाली. या माहितीच्या आधारे संबंधित ठिकाणी छापा टाकण्यात आला.

मावा तयार करण्याचे साहित्य जप्त

छाप्यादरम्यान पोलिसांनी तयार मावा, विविध रंगांची सुगंधित तंबाखू, इलेक्ट्रिक वजनकाटा आणि मावा तयार करण्यासाठी वापरण्यात येणारे लोखंडी मशीन असा एकूण १ लाख २१ हजार रुपये किमतीचा मुद्देमाल जप्त केला.

नेवासा पोलीस ठाण्यात गुन्हा दाखल

या प्रकरणी जावेद फज्जु शेख याच्याविरुद्ध नेवासा पोलीस ठाण्यात गुन्हा क्रमांक ८७९/२०२६ अन्वये भारतीय न्याय संहिता २०२३ मधील कलम १२३, २२३, २७४, २७५ व ३(५) प्रमाणे गुन्हा दाखल करण्यात आला आहे. या प्रकरणाचा पुढील तपास नेवासा पोलीस ठाण्याचे पथक करीत आहे.

स्थानिक गुन्हे शाखेच्या पथकाची कारवाई

पोलीस अधीक्षक मुम्मका सुदर्शन यांच्या सूचना व मार्गदर्शनाखाली पोलीस निरीक्षक संतोष मुटकुळे यांच्या नेतृत्वात ही कारवाई करण्यात आली. या पथकात पोलीस उपनिरीक्षक संदीप दरवडे तसेच पोलीस अंमलदार बाळासाहेब नागरगोजे, अशोक लिपणे, आजीनाथ पाखरे आणि रमीझराजा आतार यांचा समावेश होता.